英國經典Brit pop樂隊Blur噚晚喺灣仔會展開騷，全晚氣氛高漲，最high嘅部份可算係中段部份，唱到經典歌手《Parklife》嗰陣請觀眾上台一齊唱，主音Damon仲好強調上得去嗰啲都係香港人。不過其中有兩個唔係，原來Damon嘅寶貝女Missy同埋侄仔都有上台一齊high。
之後唱到另一經典作《Song 2》全場觀眾一齊邊跳邊唱「woohoo!」，震憾程度好似整個場館都震緊咁！Damon肉緊咁用支咪扑自己個頭。除咗咁激動嘅場面，都有啲比較平靜嘅時間，唱到《Thought I was a Spaceman》時，一開場已經點煙仔食嘅低音結他手Alex，趁呢個機會坐低又點支煙，睇嚟佢都幾大煙癮。
唱到有關北韓平壤嘅歌曲《Pyongyang》嗰陣，曾經去過北韓嘅Damon賣關子話:「呢首歌我可以好仔細咁解釋，不過我唔會。」Damon唱到呢首歌結尾時唔知點解成個人踎低，用雙手按著頭，好似好情緒低落咁。結他手Graham就拍拍佢，然後Damon就企番起身繼續，再唱兩首舊歌《To the end》及《This is a low》。
安歌部份，Blur表演咗《Stereotypes》、《Girls and Boys》及《The Universal》，最尾Damon單手高舉雪糕燈，似足自由神像，唔知係隱喻香港人追求自由嘅精神呢。其實佢哋隻關於香港嘅新碟《Magic Whip》有好多政治含意，就如《Mirror Ball》Damon就有提及雨傘運動。